வானளாவிய அதிகாரம் ஒருபோதும் நேர்மையாளனை உருவாக்காது.


ஓசூரில் வழிப்பறி திருடர்களால் கொல்லப்பட்ட தலைமைக் காவலர் குடும்பத்துக்கு ஒரு கோடி ரூபாய் நிதி கொடுத்திருக்கிறார் ஜெயலலிதா. அந்த கொலையை செய்ததாக கருத்தப்படும் 19 வயது இளைஞர் போலீஸ் நிலையத்தில் நெஞ்சுவலி காரணமாக இறந்திருக்கிறார். தேச பக்தியை காட்ட ஒரு வாய்ப்பு கிட்டாதா என நாள்தோறும் அல்லாடும் சிலரும் முகநூலில் இயங்கும் போலீஸ்காரர்களும் வாய்ப்பை கெட்டியாக பிடித்துக்கொண்டார்கள். பார்த்தீர்களா போலீசின் தியாகத்தை என ஸ்டேட்டஸை தட்டிவிட ஆரம்பித்தார்கள். ஒரு போலீஸ்காரர் இந்த கொலையை வேடிக்கை பார்த்த மக்களுக்கு சாபம் கொடுத்திருந்தார்.

ஜெயலலிதா இரண்டு வகையான மரணங்களுக்கு படியளப்பார். ஒன்று போலீசாரின் மரணம் (அது இயற்கையானதாக இருந்தாலும்) இன்னொன்று ஜெயலலிதாவுக்காக தானாக முன்வந்து நிகழும் மரணங்கள் (தேர்தல் தோல்வி மரணங்கள், பெங்களூர் சிறைவாச கால மரணங்கள்). மற்றபடி அவரது கொள்கை மனுசனா பொறந்தா சாகத்தான் செய்வான் என்பதுதான். அவரது போலீஸ் பாசம் எத்தனை கொடூரமானது என்பதை சிதம்பரம் பத்மினி வழக்கில் அவர் எதிர்வினையைக் கொண்டே அறிந்துகொள்ளலாம்.

எப்போதெல்லாம் ஆவணக்கொலைகள் நடக்கிறதோ அப்போதெல்லாம் வந்து ஆவணக்கொலைக்கு தனிச்சட்டம் வேண்டும் என கோரிக்கை வைக்கும் நபர்களும் இன்னமும் நம்மிடையே உலவுகிறார்கள். எத்தனை சட்டம் போட்டாலும் அதனை நிறைவேற்ற வேண்டியது போலீஸ். சாதிவெறியர்களுக்கு துணைபோகிற மற்றும் சாதியுணர்வு வலுவாக இருக்கும் அரசுத்துறை போலீஸ்தான். ஒரு இடைச்சதிக்காரனும் தலித்தும் ஒரே மாதிரி நடத்தப்பட வாய்ப்பில்லாத இடங்களில் காவல் நிலையங்களும் நிச்சயம் அடங்கும்.

ஓசூர் காவலர் கொலையில் கைது செய்யப்பட்டு காவல் நிலையத்தில் ”நெஞ்சு வலியால்” கொல்லப்பட்ட இளைஞன் மூலம் அறியப்படும் கருத்து என்ன? காவல் துறைக்கே தங்களுக்கு விதிக்கப்பட்ட சட்டபூர்வ வழிகளில் நம்பிக்கை இல்லை. சட்டப்படி ஒரு குற்றவாளியை தண்டிக்க தங்களுக்கு தகுதி இல்லை, ஆகவே எங்கள் ஆளை கொன்றவனை நாங்கள் தர்மப்படி பழிவாங்குகிறோம் என சொல்லாமல் சொல்கிறது காவல்துறை. மக்களுக்கும் அதேதான், தமக்கு எந்தவகையிலும் சம்மந்தமில்லாதவன் கொல்லப்பட எந்த சிறு காரணத்தையும் அவர்கள் ஏற்க தயங்குவதில்லை. பெங்களூரில் என்னுடன் பணியாற்றியவர் தங்கள் தெருவில் உள்ள சில வட இந்திய இளைஞர்கள் ஒருநாள் குடித்துவிட்டு கலாட்டா செய்ததைப் பார்த்துவிட்டு வந்து சொன்னார் “இவனுங்களுக்கு இரக்கமே காட்டக்கூடாது சார், சுட்டு கொன்னுடனும்”. நமக்கு எவ்வகையிலும் தொடர்பில்லாதவன் சிறிய விஷயத்துக்குகூட கொல்லப்படுவதில் இவர்களுக்கு ஆட்சேபனையில்லை.

இந்த ஒரு வாய்ப்பைப் பயன்படுத்தியே காவல்துறை தனது எல்லா என்கவுண்டர்களையும் நியாயப்படுத்திக்கொள்கிறது. இந்த ஓசூர் போலீஸ்காரர் கொலை வழக்கிலும் கொல்லப்பட்ட குற்றவாளி பற்றி எந்த பேச்சும் எழவில்லை. போலீசையே கொன்னா சும்மா விடுவாங்களா என தினசரிகள்கூட அடக்கி வாசித்தன. ஆனால் போலீசின் பழிவாங்கும் குணமும் நேர்மையோடு இருப்பதில்லை. சில ஆண்டுகளுக்கு முன்னால் ஒரு தமிழ் நடிகர் (ஆனந்த்) காரை அதிவேகமாக ஓட்டிச்செல்கையில் நிறுத்தச்சொன்ன காவலர் மீது கார் ஏற்றிக் கொன்றார். அவர் பழிவாங்கப்படவே இல்லை, மிகச்சில நாட்களில் அவர் வெளியே வந்து சௌபாக்கியத்துக்கு குறைவின்றி வாழ்கிறார். போலீசின் எல்லா மோசமான எதிர்வினைகளும் ஏழைகளுக்கு எதிராக மட்டுமே இருக்கும். பி.ஆர்.பி காவல்நிலையம் வந்தால் அந்த வளாகமே சுத்தம் செய்யப்பட்டு வெள்ளையடிக்கப்படும் நாட்டில் சல்மான்கானுக்கு எதிராக சாட்சி சொன்ன காவலர் வேலை பறிக்கப்பட்டு ஒரு அநாதையைப்போல இறந்து போகிறார்.

சென்ற வாரம் நடந்த ஸ்வாதி படுகொலை பற்றிய ஊடகம் மற்றும் பிரபலங்களின் கருத்து ”மக்கள் அந்த கொலையைத் தடுக்கவில்லை” என்பதுதான். ஆனால் இது உண்மையில் மக்களின் பிழை அல்ல. சில மாதங்களுக்கு முன்னால் தன் உயிரை பணயம் வைத்து வெள்ளத்தில் சிக்கிய மக்களை காப்பாற்ற சென்றது இதே சென்னை வாழ் மக்கள்தான். அப்படியானால் ஒரு கொலை வழக்கிற்கு சாட்சியாகக்கூட வர விரும்பாமல் மக்களை விலகி ஓடச்செய்வது எது?

சந்தேகமில்லாமல் போலீசுக்கு உள்ள வானளாவிய அதிகாரம்தான். நீங்கள் தெரிந்த ஒருவரை போலீஸ் ஸ்டேஷன்வரை துணைக்கு அழைத்து பாருங்களேன், வர மாட்டார்கள். வெளியாகும் போலீஸ் படங்களை எல்லாம் ஓடவைத்தாலும் மக்களுக்கு போலீஸ் மீது மரியாதை இல்லாமல் பயம் மட்டுமே இருப்பதன் காரணம் அவர்களால் யாரை வேண்டுமானாலும் குற்றவாளியாக்க இயலும்.

தன் பதினைந்து வயது மகனை புது ஆற்றில் சாகக்கொடுத்தவர் வீட்டில் காத்திருந்து அந்த வழக்கிற்காக (பிணம் எரியூட்ட கிளம்பிய உடனே) பணம் பெற்ற போலீஸ்காரரை எங்கள் தெருவில் பார்த்திருக்கிறோம். நகை திருடுபோன வீட்டில் பறிகொடுத்தவரை குற்றவாளிபோல விசாரித்த காவலர்களை பார்த்திருக்கிறேன். சேலம் வினுப்பிரியா எனும் இளம்பெண்ணை மரணத்துக்கு போலீஸ் அவரை நடத்திய விதமும் ஒரு காரணம். ஒரு சிறுவன் வாயில் துப்பாக்கியால் சுட்ட போலீஸ் அதிகாரி சிறை செல்லவில்லை. ஒரு பெண்ணை கைது செய்து தஞ்சை ஓட்டலில் பல நாட்கள் சட்டவிரோதமாக அடைத்துவைத்து பாலியல் வன்கொடுமை செய்த காவல் அதிகாரி (அந்தப்பெண் தெளிவாக தற்கொலைக் கடிதம் எழுதிவிட்டு தூக்கில் தொங்கிய பின்பும்) சில நாள் சிறைவாசத்துக்கு பிறகு பணியில் நீடிக்கிறார்.

திருப்பூரில் நான் வசித்த வாடகைவீட்டின் கீழ் போர்ஷன்காரர் ஒரு கொலைவழக்கில் கைதானார். அதற்கான சாட்சியாக போன அனுபவம் எனக்கிருக்கிறது. போலீஸ் எப்போது விசாரணைக்கு வந்தாலும் பர்மிஷன் போட்டுவிட்டு வீட்டுக்கு ஓடவேண்டும், வழக்கு சி.பி.சி.ஐடிக்கு போன பிறகே விசாரணை அச்சுறுத்தும் தொனியில் இருந்து மாறியது. குற்றவாளியை அடையாளம் காட்ட எங்களை அழைத்துப்போனபோது மணி நள்ளிரவு 1.30 (காவல் நிலையம் 20 கி.மீ தொலைவில் இருக்கிறது). நீதிமன்றத்தில் சாட்சி சொல்ல கோவைக்கு 3 நாட்கள் அலைந்தோம் (விடுப்பு எடுத்தால் சம்பளம் கிடையாது, பயண செலவும் சாப்பாட்டு செலவு கூடுதல் தண்டம்). அதன் பிறகு திடீரென இனி அழைத்தால் மட்டும் வந்தால் போதும் என்றார்கள்… கடைசிவரை சாட்சி சொல்ல அழைக்கப்படவேயில்லை. எத்தனை கஷ்டப்பட்டாவது கடமையை நிறைவேற்றலாம் என நினைத்தாலும் முடியாது. சாட்சியத்தை அவர்கள சொல்லிக்கொடுத்தபடிதான் சொல்ல வேண்டும் (அவர்களே பயிற்சியளிப்பார்கள்). இன்னும் கொடுமை சாட்சிகளான எங்களை குற்றம்சாட்டப்பட்டவர் தரப்பு வழக்கறிஞர் செல்ஃபோனில் படம் எடுத்தார்… அதனை காவல் உதவி ஆய்வாளரிடம் சொன்னபோது நீயும் அவரை ஃபோட்டோ எடுத்துக்க என பதிலளித்தார்.

சாட்சிகளே இந்த அழகில் நடத்தப்பட்டால், யாரால் தைரியமாக குற்றத்தை தடுக்க இயலும் அல்லது யார்தான் துணிந்து புகார் தர முன்வருவார்கள்? நமது வளர்ப்பு முறைக்கும் இந்த ஒதுங்கிப்போகும் போக்கோடு நெருங்கிய தொடர்பு இருக்கிறது என்றாலும் அதனைக் காட்டிலும் வலுவானது போலீசின் மீதான அச்சம் மற்றும் அவநம்பிக்கை.

ஆளுங்கட்சி எதிர்கட்சி என பாகுபாடு இல்லாமல் உதிர்க்கும் கருத்து போலீசுக்கு அதிக அதிகாரம் கொடுத்தால் குற்றங்கள் குறையும் என்பதுதான். ஆனால் கட்டுப்படில்லாத அதிகாரம் குற்றங்களை வளர்க்கவே செய்யும். அதிக அதிகாரத்தின் மூலம் ஒருவர் பணத்தை சம்பாதிக்கவே முயல்வார். அப்படி போலீஸ்காரர் ஒருவர் தன் அதிகாரத்தை தவறாக பயன்படுத்தினால் அதன் பலன் யாருக்கு போகும்? குற்றச்செயலில் ஈடுபடுவோருக்குத்தான். அதுதான் இன்றைய குற்றச்செயல்களின் பெருக்கத்துக்கு காரணம் (வறுமை, வேலையின்மை மற்றும் இடப்பெயர்வு ஆகியவையும் பிரதான காரணிகளே, ஆனால் கட்டுரையின் வரம்புக்குள் அவை இல்லை).

போலீசுக்கு கேட்பாரற்ற அதிகாரம் இருக்குவரை,

அவர்களது குற்றங்கள் அவர்களாலேயே விசாரிக்கப்படும்வரை,

அவர்கள் தங்களை மக்களைவிட மேலானவர்களாக கருதிக்கொள்ளும்வரை குற்றங்களும் குறையப்போவதில்லை, குற்றங்களை தட்டிக்கேட்கும் சாமனியரும் உருவாகப்போவதில்லை.

Advertisements

4 thoughts on “வானளாவிய அதிகாரம் ஒருபோதும் நேர்மையாளனை உருவாக்காது.”

  1. போலீசுக்கு கேட்பாரற்ற அதிகாரம் இருக்குவரை,
    அவர்களது குற்றங்கள் அவர்களாலேயே விசாரிக்கப்படும்வரை,
    அவர்கள் தங்களை மக்களைவிட மேலானவர்களாக கருதிக்கொள்ளும்வரை குற்றங்களும் குறையப்போவதில்லை, குற்றங்களை தட்டிக்கேட்கும் சாமனியரும் உருவாகப்போவதில்லை.—இதுதான் உண்மையான அனுபவ உண்மை.

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s